Plantun de Prouvènço

Pèr coumpara dos planto d'encò nostre

Carex hispida & Ononis spinosa subsp. antiquorum

Queirello(-agarrussido)

Carex hispida

Cyperaceae

Àutri noum : Moutouso, Sagneto.

Nom en français : Laîche hérissée.

Descripcioun :
Aquesto queirello trachis dins li palun e li prado umido souvènt richo en sau. Douno d'èr à la queirello-bleto, pamens èi bèn pu grosso emé un gros rizoumo e de fueio de 4 à 8 cm de larjo. S'atrovo de tres à sièis espigo mascle de 4 à 9 cm, e de tres à sèt espigo femèu. Se destrìo subretout à soun utriculo amé de ciho redo sus li bord (dessin). L'escaumo èi pounchudo (fotò).

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 20 à 60 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Carex
Famiho : Cyperaceae

Ordre : Poales

Coulour de la flour : Jauno
Petalo : ges
Ø (o loungour) flour : Pancaro entresigna
Flourido : Printèms

Sòu : Na Cl
Autour basso e auto : 0 à 400 m
Aparado : Noun
Abriéu à jun

Liò : Roubino - Prado umido - Palun - Aigo-sau
Estànci : Mesoumediterran
Couroulougi : Éuroupenco
Ref. sc. : Carex hispida Willd., 1801

Estanco-biòu

Ononis spinosa subsp. antiquorum

Fabaceae Leguminosae

Àutri noum : Tanco-biòu, Restanco-biòu, Avagoun, Ajagoun, Lènte.

Noms en français : Bugrane épineuse, Bugrane des anciens.

Descripcioun :
Aquesto planto pulèu bèn couneigudo, trachis dins la garrigo, tepiero seco e ermas. Dins li champ, emé sa forto racino fasié tanca l'arraire adounc li biòu, d'ounte lou noum; la subsp. presentado eici, dóu miejour de Prouvènço, èi di proun espinouso.

Usanço :
L'estanco-biòu èi couneigu desempièi li gre (Galien) pèr faire parti li graviho dóu ren ; defèt, la racino èi proun diuretico (mai sènt proun marrit). La planto èi vertuouso tambèn contro lou ràumi de pèu (eczema) bonodi si prouprieta anti-enflamativo. Èi peréu anti-bateriano (gagarisme pèr lou mau de gorjo), lucho contro li champignoun e mai enca.